பெரிய கனவு காணுங்கள்!
ந.வினோத்குமார்
மும்பை. பார்ஸி குடும்பம். வெறுமனே பி.காம் படிப்பு. சொல்லிக்கொள்ளும்படியாக பெரிய பின்புலமோ பொருளாதார வளமோ இல்லை. 'ஏதாச்சும் புதுசா செய்யணும்...' என்கிற ஆர்வம் மட்டுமே மூலதனம். அதைக் கொண்டு ஒருவன் வணிக உலகில் வெற்றிக்கொடி பறக்கவிடுகிறான். ஒரு கட்டத்தில் வால்ட் டிஸ்னி நிறுவனமே அவனைத் தேடி வருகிறது....
என்ன... இது ஏதோ தமிழ்த் திரைப்படத்தில் வருகிற காட்சி போல இருக்கிறதா..? 'லக்ஷயா' (2004), 'ஸ்வதேஸ்' (2004), 'ரங் தே பஸந்தி' (2006), 'தி நேம்ஸேக்' (2006), 'லைஃப் இன் எ மெட்ரோ' (2007), 'ஜோதா அக்பர்' (2008), 'எ வென்ஸ்டே' (2008), 'தேவ் டி' (2009), 'ஹரிஷ்சந்திரா ஃபேக்டரி' (2009), 'பீப்லி லைவ்' (2010), 'பான் சிங் தோமர்' (2010), 'நோ ஒன் கில்ட் ஜெஸ்ஸிகா' (2011), 'வழக்கு எண் 18/9' (2012), 'பர்ஃபி' (2012), 'கை போ சே' (2013), 'சென்னை எக்ஸ்பிரஸ்' (2013), 'சாம் பகதூர்' (2024), 'உள்ளொழுக்கு' (2024)... இந்த வெற்றிப் படங்களின் பின்னணியில் தயாரிப்பாளராகவோ அல்லது இணைத் தயாரிப்பாளராகவோ இருந்து இந்திய சினிமாவை அடுத்த கட்டத்துக்குக் கொண்டு சென்ற 'யு டி.வி.' நிறுவனர் ரோன்னி ஸ்க்ரூவாலாவின் தொழில்முனைவுப் பயணம் இன்னும் திரைப்படமாகாமல் இருப்பதுதான் ஆச்சர்யம்!
அந்த ஸ்டார் தொழில்முனைவர், தன் பயணத்தில் கண்ட ஏற்ற இறக்கங்களை 'ட்ரீம் வித் யுவர் ஐஸ் ஓப்பன்' என்ற புத்தகத்தில் அனுபவச்சாறாகப் பிழிந்து கொடுத்திருக்கிறார். வெளிவந்த ஆண்டு 2015. ரூபா பதிப்பகம் வெளியீடு.
எண்பதுகளின் தொடக்கத்தில் ரோன்னி தொடங்கிய முதல் வியாபாரம்... டூத் பிரஷ் தயாரிப்பு! ஆரம்பித்த சில மாதங்களிலேயே டூத்பிரஷ் விற்பனையில் முன்னணி நிறுவனமாக நிலைபெற்றது,
'லேசர் டூத்பிரஷ்' ! ஆனால் ரோன்னிக்கு அந்தத் தொழிலில் தொடர்ந்து நிலைத்திருக்க வேண்டுமென்ற ஆவல் இருக்கவில்லை. ஏனென்றால் அவருக்கு வேறொரு தேடல் இருந்தது.
பள்ளி, கல்லூரிக் காலங்களிலேயே தான் குடியிருந்த அடுக்குமாடிக் கட்டடங்களில் நாடகங்கள் நடத்தி, அதன் மூலம் காசு பார்க்கத் தொடங்கியவர் ரோன்னி. அந்தக் கலை ஆர்வமே அவரை 'கேபிள் டி.வி.' வியாபாரத்துக்கு இழுத்து வந்தது. எண்பதுகளில் அப்போதுதான் தொலைக்காட்சிப் பெட்டிகள் இந்தியாவின் முக்கிய, பெரிய நகரங்களில் கொஞ்சம் கொஞ்சமாகத் தெரியத் தொடங்கியிருந்தது. தூர்தர்ஷன் மட்டும்தான் கதி. அந்த நிலையை 'கேபிள் டி.வி.' ஒளிபரப்பு மாற்றியது.
ரிமோட் கன்ட்ரோலர்கள் இல்லாத காலம் அது. சேனலை மாற்ற வேண்டும் என்றால் எழுந்து சென்றுதான் மாற்ற வேண்டும். அப்போது எவ்வளவு சேனல்கள் இருந்திருக்கும்? ரொம்ப யோசிக்க வேண்டாம். ஜஸ்ட்... இரண்டுதான்! ஒன்று, தூர்தர்ஷன்... இன்னொன்று, 'நெட்வர்க்'. ஆம்... அப்படித்தான் தனது சேனலை அழைத்தார் ரோன்னி. தினசரி மாலை நான்கு மணி நேரம் சில வெளிநாட்டு நிகழ்ச்சிகள், சில இந்திய நிகழ்ச்சிகள் ஆகியவற்றை அந்த சேனல் ஒளிபரப்பியது. அந்த கேபிள் நெட்வர்க் வியாபாரம் தொடங்கப்பட்ட சில ஆண்டுகளிலேயே 60 சதவீத மும்பை நகரம் அவரது சேனலை பணம் கட்டிப் பார்த்தது.
இன்னும் சில ஆண்டுகள் நீடித்திருந்தால் மொத்த இந்தியாவையும் தனது வணிக வலையில் ரோன்னி வீழ்த்தியிருக்கலாம். ஆனால் அவருக்குள் இருந்த தேடல் அவரை அப்படி யோசிக்க விடவில்லை. அந்த வியாபாரத்தை இன்னொருவருக்குக் கைமாற்றிவிட்டு, வெளிநாட்டு சேனல்களுக்கு ஆவணப்படங்கள், விளம்பரப் படங்கள் எடுத்துக்கொடுப்பது போன்ற வேலைகளைச் செய்து வந்தார். அப்படிப் பிறந்ததுதான் 'யுனைட்டட் டெலிவிஷன்' சுருக்கமாக 'யு டி.வி.'
தொண்ணூறுகளின் மத்தியில் இந்தியத் தொலைக்காட்சிகளில் ஒளிபரப்பாகிய எந்தத் தொடரும் 13 வாரத்துக்கு மேல் நீண்டது இல்லை. மிஞ்சிப் போனால் 26 எபிசோட்கள். அப்படியான சூழலில் 'சாந்தி' எனும் நாடகம் மூலம் தொலைக்காட்சி வரலாற்றில் ஒரு புதுமையை நிகழ்த்தியது யு டி.வி. 1994 ஆம் ஆண்டு முதல் 1998 வரை, வாரம் ஐந்து நாட்கள் என ஆண்டுக்கு 260 எபிசோட்கள் என சீரியல் புரட்சி நடத்தினார் ரோன்னி. அந்த நாடகத்தில் நாயகியாக அறிமுகமானவர்தான் மந்திரா பேடி.
ஏற்கெனவே தன்னிடமிருந்த வெளிநாட்டு ஊடகத் தொடர்புகள் மற்றும் இந்திய ஊடகத் துறையில் தான் நிகழ்த்திய பாய்ச்சல் ஆகியவற்றின் காரணமாக அமெரிக்காவின் 'நியூஸ் கார்ப்' நிறுவனத்தின் ரூபெர்ட் மர்டாக் யு டி.வி. உடன் இணைந்து பணியாற்ற்றினார். தொடர்ந்து தமிழ்நாட்டில் சன் டி.வி., விஜய் மல்லய்யாவின் விஜய் டி.வி. ஆகியவற்றுடன் இணைந்து கலக்கியது யு டி.வி.
புத்தாயிரத்தின் முதல் பத்தாண்டுகளில் 'ஹங்காமா டி.வி.' மூலம் இந்தியாவிலேயே குழந்தைகளுக்கான முதல் டி.வி. எனும் கொண்டாட்டத்துடன் நிகழ்ச்சிகளைப் படைக்கத் தொடங்கியது ரோன்னி அன்ட் டீம். 'பவர் ரேஞ்சர்ஸ்', 'ஷின் சான்' உள்ளிட்ட பல நிகழ்ச்சிகளுக்கு தொலைக்காட்சியிருந்த வீடுகள் பலவற்றில் சுட்டிகள் பலர் ரசிகர்களானார்கள். பின்னாளில் அந்த டி.வி.யில் அமெரிக்க வால்ட் டிஸ்னியின் இந்தியக் கிளை இணைந்ததிலிருந்தே 'ஹங்காமா'வுக்கு இருந்த புகழை அறியலாம்.
அதைத் தொடர்ந்து, 'இந்தப் பொருட்களைக் காட்டினால் மக்கள் வாங்குவார்கள்' என்றுணர்ந்து அவற்றை வாங்குவதற்கு மக்களைத் தூண்டுவதற்காகவே 'டெலிஷாப்பிங் நெட்வர்க்' (டி.எஸ்.என்) எனும் சேனலைத் தொடங்கினார் ரோன்னி. ஜூனூன் தமிழில் வாக்குவம் கிளீனர் முதல் தலைமுடி வளர்ச்சிக்கான மூலிகை எண்ணெய் வகைகள் வரை, அந்த டி.வி.யில் விளம்பரப்படுத்தப்படாத பொருட்களே இல்லை என்று சொல்லலாம். அமேசான் டெலிவரி சேவை எல்லாம் வருவதற்கு முன்பே வீட்டிலிருந்தே நமக்குத் தேவையான பொருட்களை வாங்கலாம் என்ற அந்த வியாபார உத்தியைப் பிடித்ததில் இருக்கிறது ரோன்னி ஸ்க்ரூவாலாவின் வெற்றி ரகசியம்.
தொலைக்காட்சியில் சாதித்த பிறகு சினிமாவுக்கு வருவது என்பது இயல்பாக நடப்பதுதான். ரோன்னிக்கும் அப்படித்தான். 1997 ஆம் ஆண்டிலிருந்தே திரைப்படத் தயாரிப்பில் இயங்கி வந்தாலும், 2006 ஆம் ஆண்டு வெளிவந்த ஆமிர் கான் நடிப்பில் வெளிவந்த 'ரங் தே பஸந்தி' படம்தான் 'யு.டி.வி.'க்கு மிகப் பெரும் வெற்றியைக் கொடுத்தது.
சீரியல், டெலிஷாப்பிங், குழந்தைகள் சேனல், படத் தயாரிப்பு என வெற்றிகரமாக இயங்கி வந்த 'யு டி.வி.'யை 2012 ஆம் ஆண்டு வால்ட் டிஸ்னி நிறுவனம் முழுமையாக சுவீகரித்துக்கொண்டுவிட்டது.
ஆனால் ரோன்னியின் 'வின்னிங் ஸ்ட்ரீக்' மட்டும் நின்றபாடில்லை. 'யு டி.வி.'க்குப் பிரியா விடை கொடுத்த கையுடன், தன்னுடைய 'ஸ்வதேஸ் அறக்கட்டளை' மூலம் வறுமைக்கோட்டுக்குக் கீழுள்ள மக்களின் முன்னேற்றத்துக்காக நிதி உதவி செய்வது, இணைய வழி உயர்கல்விக்கான 'அப்கிராட்' எனும் நிறுவனத்தைத் தொடங்கியது, கால்பந்தாட்டம், கபடி போன்ற விளையாட்டுகளை ஊக்குவிக்க 'யு ஸ்போர்ட்ஸ்' எனும் விளையாட்டு நிறுவனத்தைக் கட்டமைத்தது, ஓ.டி.டி. தளங்களைக் குறிவைத்து இயங்கும் இயக்குநர்களின் படங்களைத் தயாரிக்க 'ஆர்.எஸ்.வி.பி. மூவிஸ்' எனும் தயாரிப்பு நிறுவனத்தைத் தொடங்கியது என அடுத்தடுத்து பல சாதனைகளைச் செய்தபடியே இருக்கிறார் ரோன்னி.
இவ்வளவு வெற்றிகளுக்குப் பின்னுள்ள ரகசியம் என்ன என்று அவரிடம் கேட்டால், இப்படித்தான் சொல்வார்: Just dream your own dream--and when you do it, dream with your eyes open.
படம் உதவி: amazon.in (புத்தக முகப்பு), Wikimedia Commons (ரோன்னி ஸ்க்ரூவாலா)
